Најголемиот производител на процесори за десктоп и лаптоп компјутерите последниве неколку месеци е под особено голема офанзива на главниот конкурент AMD, кој со своите Ryzen чипови направи вистинска мешаница на пазарот. Одговорот на Intel ќе биде нова Core i9 серија на процесори, која ќе биде своевиден Core i7 на стероиди, со многу поголем број на процесорски јадра.
Новите процесори на Intel ќе бидат дел од Skylake-X (четири од нив) и Kaby Lak-X сериите, барем ако може да се верува на член на форумот на AnandTech. X во името значи екстремна верзија на „обичните“ верзии со истата архитектура. На пример, Core i9-7920X е чип со 12 јадра, односно 24 виртуелни јадра, кои иако се без специфициран такт, самиот број на јадрата најавува исклучително моќен чип.
Под него ќе биде Core i9-7900X, за кој информациите велат дека ќе работи на 3,3 GHZ, со “Turbo Boost” на 4,3 GHz. Надолу по линијата ќе бидат поставени Core i9-7820X и 7800X со осум, односно шест јадра. Интересно, сите Core i9 чипови ќе бидат базирани на Skylake-X платформата, додека на Kaby Lake-X платформата ќе бидат базирани нови Core i7 чипови – i7-7740K (4.3GHz/4.5GHz) и i7-7640K (4GHz/4.2GHz).
Сите овие информации не се потврдени и треба да се земат со задршка, но се прилично логични. Имено, доколку Intel сака да се врати на радарот на ентузијастите, кои ги загуби во значителен број, мора да лансира процесори со голем број на јадра кои ќе конкурираат на Ryzen чиповите. Едно е сигурно – ова се возбудливи времиња за гејмерите.
Извор: TechRadar, Anand Tech Forum, TechCrunch
