Секоја година во мај, Microsoft одржува конференција насочена кон дивелоперите, но и новитетите во Windows, наречена Build. Оваа година имаше многу нови работи кои треба да пристигнат во наредниве неколку месеци и кои се особено важни и корисни за корисниците и дивелоперите на Windows 10 компјутерите.
Најголема вест беше новата Fall Creators Update надградба за Windows 10 (досега позната како Redstone 3), која е повторно насочена кон креаторите и која донесува низа подобрувања кои треба да го подобрат целосното корисничко искуство, а воедно има и нова апликација која треба да го стават Windows 10 на радарот на оние кои работат со мултимедијални содржини.
Од новитетите, четирите поголеми кои ги најави Microsoft се: Timeline, кој овозможува враќање на одредено време во минатото, со одличен преглед на тоа што сте правеле во одредено време, потоа “Pick Up Where You Left Of” која ќе ви овозможи да продолжите тоа што сте работеле на друг уред, вклучувајќи ги и Android и iOS, Cloud Clipboard пак овозможува Copy-Paste на текст и други датотеки меѓу Windows 10 компјутер и Android, iOS или Windows 10 Mobile смартфон, додека четвртата, веројатно и највидлива е Fluent Design System, претходно познат како Project Neon.
Fluent Design System ги задржува принципите на досегашниот дизајн на Windows 10, но изгледа многу помодерно и многу поблизу до Android и iOS, што е веројатно направено со цел апликациите да изгледаат слично независно од платформата. Сепак, Fluent Design System оди многу подалеку и внесува различни 3D елементи, кои ќе функционираат одлично и во холограмскиот Windows 10 за изменета реалност.
Апликацијта која ја спомнавме погоре и која ќе биде еден од носителите на Fall Creators Update е Microsoft Story Remix. Се работи за апликација за видео и други мултимедијални содржини, која ќе ви овозможи правење на видеа со многу графички 3D елементи во нив, исто како што прават во холивудските студија. Да, со оваа апликација и вие ќе може лесно да направите видео со вашиот омилен филмски лик до вас и да го објавите на Facebook или Instagram. Или барем така најавува Microsoft.
Втора апликација која доби надградба е PowerPoint, која сега ќе може да преведува презентации во живо. Исто така, новитети има и во Cortana, која сега се отвора кај дивелоперите како “Cortana Skills Kit”, што најавува многу различни уреди со Cortana за домот, слични на оние со Amazon Alexa и Google Assistant. Поточно, наскоро ќе може да имате безжичен звучник во домот на кој ќе може да му се обратите со “Hey Cortana”.
Покрај новитетите во Windows 10, Microsoft го претстави и Graph, кој е всушност спој на функционалности кои овозможуваат лесно префрлање од вашиот Windows 10 компјутер на вашиот смартфон со Android или iOS. Исто така, тие претставија систем со вештачка интелигенција кој може да ги препознава предметите околу себе и кој може да помогне во најразлични типови на работилници и производствени капацитети.
Не помалку важно, нешто што требаше да се случи одамна ќе биде набрзо имплементирано – OneDrive нема да ги зачувува датотеките директно на вашиот компјутер, односно скапоцениот SSD диск со мал капацитет, туку на секој двоен клик ќе ги симнува од интернет, односно ќе ги ќешира на компјутерот.
