Новиот 3D принтер Voltera, кој моментално е “Kickstarter” проект, ќе овозможи принтање на електрични кола, заедно со нанесувањето на штетните пасти и хемикалии. На овој начин ќе се обиде драматично да го олесни правењето прототипи, во процесот на тестирање на новите хардверски компоненти и сл.
Принтерот работи со кондуктивно мастило со кое го принта претходно избраното коло на парчето пластика. Идејата на производот не е да ги замени големите машини за правење матични плочи, туку да им овозможи на истражувачите брзо принтање на нов дизајн без за тоа да треба да чекаат неколку недели. Притоа и да се направи грешка, ве делат само неколку минути до нова плоча!
Покрај „цртањето“ на колото, Voltera ќе може и да залеми компоненти, целосно автоматски! За таа цел има посебен дел кој има вграден калај и паста. Исто така, доколку некој дел погрешно се стави, истиот може и да се одлеми. Нешто што дефинитивно ќе им ја олесни работата на оние што сакаат електроника, а имаат недоволно мирни раце.
Voltera е инаку управувана од специјален софтвер, а содржи еден резервоар за кондуктивно мастило и еден до електро – отпорно мастило, кои се променливи. Истите се магнетно прикачени, што значи дека многу лесно ќе може да се сменат кога ќе треба да се промени процесот, односно прво цртањето на кондуктивното, а потоа на електро – отпорното мастило, со цел да може да се направи плоча на две нивоа.
Софтверот дури и автоматски открива каде би се споиле двете кола и автоматски нанесува од отпорничкото мастило, како не би дошло до спој, во големо намалувајќи ги можностите за грешка. Исто така, софтверот ќе овозможи лесно погодување на колото на двостраните плочи, што е исто така големо олеснување.
Досега, правењето електрични кола беше навистина долготраен процес, а за посложените, неретко требаше и да се плати во некоја специјализирана продавница и да се почекаат неколку денови. Voltero, процесот на целосно правење на една цела матична плоча, го сведува на само неколку часа, а го прави и многу поевтино. Дефинитивно, еден од најкорисните Kickstarter-и годинава!
Извор: Kickstarter
