CES2014 настанот полека се претвора во натпревар помеѓу производителите на телевизори, односно натпревар во тоа кој ќе претстави поголем телевизор со поголема резолуција. Иако Full HD телевизорите со 1920 x 1080 резолуција се суште актуелни, оваа година на CES почнаа да бидат претставувани наредната генерација на телевизори со 4К резолуција, односно 3840 x 2160 пиксели, за кои што сеуште нема достапна содржина, покрај малиот број на тест содржини. Сепак ни Full HD содржината не е сеуште целосно распространета секаде во светот, односно кај телевизиските канали.
Sharp отиде подалеку и од овој нов тренд, па претстави телевизор со 8К резолуција, односно 7680 x 4320 пиксели. Истиот има можност за гледање на 3D содржина без потреба од користење на очила, а од Sharp тврдат дека сликата е навистина живописна. Како и што би било очекувано, ова е само прототип кој што ги покажува можностите на достапната технологија денес, па сеуште не е одредена дата на продажба, како и цената која би ја имал овој телевизор.
Дали телевизорите над одредена големина и резолуција имаат реална примена или се само начин за нудење нешто различно од конкуренцијата, а и за луѓето што немаат против да купуваат се што излегува на пазарот, останува да видиме. Ова е прашање посебно за 8К резолуцијата, поради фактот што просечната оддалеченост на гледање на телевизија е поголема од таа потребна за овие огромни резолуции да почнат да прават разлика. Тука е и достапноста на содржина со ваква резолуција, која што е многу ретка.