Нашава земја, иако не спаѓа во најразвиени во светот, има прилично добро развиена информатика, односно скоро секое домаќинство има некаков тип на компјутер дома и интернет пристап. Сепак, во многу земји во светот, каде живее поголемиот дел од населението, како на пример Индија, проблем претставува дури и достапноста на електрична енергија, а да не спомнуваме интернет пристапот или пак можноста да се купи компјутер.
Затоа тука на помош доаѓа Endless компјутерот, кој има неколку важни карактеристики што го прават одличен избор за пазарите во развој. Компјутерот има посебна Endless верзија на Linux, која одлично функционира и без компјутерот да е поврзан на интернет мрежата. Причината за тоа е што во него доаѓаат инсталирани преку 150 апликации, кои се полни со информации.
Како пример ќе ја земеме Wikipedia, која ги содржи сите информации во самиот компјутер, нормално без секојдневните обновувања, а има и целосно опремени апликации за здравје, земјоделие, готвење итн. Компјутерот со секое поврзување на интернет ги обновува информациите, кои потоа се достапни надвор од мрежата, односно без компјутерот да биде поврзан на интернет.
Иако ова нас ни делува прилично старовременски, Endless компјутерот има вистинска шанса да ја донесе компјутеризацијата поблизу до оние кои немаат многу средства да си ја овозможат. Да се има електронска енциклопедија која содржи многу знаење е добар начин луѓето од тие земји да дојдат до повеќе знаење, многу блиско на она што го има остатокот од светот.
Компјутерот инаку чини само 169 долари, што иако не е малку за тие пазари, веројатно е сума која вреди да се потроши.
Извор: Fastcoexist, Endless
