Денешните гејмерски лаптопи се многу подобри од своите претходници кога е во прашање дизајнот – додека порано тоа беа компјутери кои скоро и да не беа преносливи, денес барем може да се стават во ранец.
Сепак, за оние кои сакаат да ја имаат моќта на еден гејмерски компјутер во ултрабук пакување, тука е новата Nvidia Max-Q технологија.
Со Nvidia Max-Q, познатиот производител на графички чипови најавува дека новите гејмерски лаптопи ќе имаат многу потенок дизајн. Ова е постигнато со оптимизација на актуелните графички процесори кои се вградуваат во лаптопите, односно Nvidia GTX 1070 и 1080. Тие имаат скоро иста архитектура како и претходно, но многу подобар систем за оптимизирање на работата на чипот, а со тоа и намалување на работната температура и потреба од големи кулери.
Nvidia има постигнато напредок и во поглед на гласноста на системот за ладење, преку таканаречениот Whisper Mode. И тука, графичкиот чип константно ја следи својата температура и перформансите кои ги дава во дадената игра (слики во секунда) и на тој начин го оптимизира ладењето за да го намали звукот кој го произведува лаптопот, нешто што исто така претставува проблем кај гејмерските лаптопи.
Лаптопите кои ќе ја имаат новата Max-Q технологија набрзо ќе бидат понудени на пазарот и тоа од цела плејада производители, вклучувајќи ги тука: Acer, Alienware, Asus, Gigabyte, HP, Lenovo, Maingear, MSI и Origin PC.
