Во моментов, скоро сите OLED екрани кои се вградуваат во паметните телефони, односно дури 97,7%, се произведени од Samsung. Од друга страна пак, големите OLED дисплеи, односно оние за телевизорите, се специјалност на LG. Наскоро, LG ќе влезе и во бизнисот со помали OLED екрани, конкурирајќи му на својот лут конкурент.
Причината за ова е многу едноставна. Побарувачката на OLED дисплеи продолжува да расте – наскоро дури и iPhone ќе има OLED дисплеј. Сепак, во почеток LG ќе почне со многу мало производство – очекувајте околу 15.000 примероци да излегуваат секој месец. Тие ќе бидат понудени на кинеските производители на смартфони и тоа веројатно за премиум модели кои не се продаваат во толку големи бројки.
LG веќе вложи околу 1,75 милијарди долари во погонот во кој ќе се произведуваат P-OLED (полимерни OLED) дисплеите од шестата генерација, кои можат и да се заоблат во најразлични форми, како на пример Edge кај Samsung. Дополнително, тие имаат поддршка и од Google, кој P-OLED екраните за Pixel смартфоните ги набавува токму од LG и со растот на продажбата на овие модели, тие се спремаат за поголемата побарувачка.
Исто така, LG е во добри односи со Apple – тие веќе изработуваат специјални надворешни 5K монитори за нивните MacBook лаптопи и договор за производство на OLED екрани за iPhone или iPad е многу веројатен. Сепак, iPhone 8 веројатно ќе има OLED дисплеј од Samsung – погонот на LG сѐ уште не може да ги задоволи потребите на Apple.
