Информациите изминатите недела дена одат во правец на тоа дека Apple планираат да користат „четботови“ од компаниите кои веќе ги имаат развиено, а вештачката интелигенција која тие ја развиваат ќе ја користат за други функции кои функционираат од самиот уред.
Од Apple наводно се во преговори со Google за користење на нивниот Gemini, но преговори можно е да се одржуваат и со OpenAI за ChatGPT и уште неколку слични конкуренти.
Што точно се случува ќе дознаеме во јуни кога се одржува WWDC конференцијата на која се презентираат наредните верзии од оперативните системи, покрај другото. За iOS 18 се најавува дека ќе биде најголемата надградба досега, а во голем дел тоа ќе се должи на додавањето на доста нови функции кои функционираат со генеративна вештачка интелигенција.
Во Кина очекувано се најавува дека Apple би договориле партнерство со некоја од кинеските компании кои работат со вештачка интелигенција, па неофицијално таа компанија е Baidu.
„Четботот“ од оваа компанија е наречен Ernie – Enhanced Representation through Knowledge Integration. Ernie функционира како и сите други вакви „четботови“, па нема потреба од посебно објаснување.
Не верувам дека Apple ќе потврди било што официјално пред WWDC 2024, па остануваат уште неколку месеци додека дефинитивно видиме што планираат од компанијата за оваа година.
Марк Гурман објаснува зошто Apple се одлучуваат на договарање партнерства, наместо развој на „четбот“ во неговиот најнов неделен билтен.
