Hewlett-Packard припремаат нова верзија на својот Pavilion Chromebook која ќе функционира на база на Haswell процесор. Како што може да се заклучи од името, новиот Chromebook 14 доаѓа со четиринаесет инчен екран кој ќе биде со резолуција од 1366×768 пиксели и ќе го користи ChromeOS оперативниот систем на Google.
Chromebook 14 ќе содржи Intel Celeron 2955U процесор од новата Haswell линија, 2 гигабајти DDR3 RAM меморија и 16 гигабајти SSD драјв, a ќе бидат и модели со 4 гигабајти меморија и SSD од 32 гигабајти. Исто така, на лаптопот ќе бидат присутни USB 2.0 и USB 3.0 порти, слот за SD картичка, HDMI и аудио конектори, како и веб камера. За мрежно поврзување Chromebook 14 ќе користи Wi-Fi, Bluetooth, Ethernet, а ќе има и опција за 3G and 4G LTE. Батеријата треба да трае околу 9.5 часа со едно полнење.
Новиот Chromebook 14 е изработен од пластика и тежи 1.8 килограми, а ќе биде достапен во три бои: снежно бела, тиркизна и корална портокалова.
Цената за основниот модел на Chromebook 14 ќе изнесува 299 долари и ќе вклучува 100 гигабајти “cloud” простор преку Google Drive сервисот кои ќе бидат достапни во период од две години.
