Сигурносниот појас не влијае на тоа дали ќе се случи одредена сообраќајна незгода или не, но значително влијае на тоа какви ќе бидат последиците од сообраќајните незгоди. За жал фактите и состојбите покажуваат дека голем дел од возачите и патниците не користат сигурносен појас. Со цел подигање на свеста за поголема употреба на сигурносните појаси РСБСП со одговори на неколку важни прашања поврзани со сигурносните појаси.
– Која е целта и како правилно да користите сигурносен појас?
1. Основната цел на користењето на сигурносниот појас е:
- да ги чува возачот и патниците на своите места во случај на судир;
- да се намали движењето на телото напред и назад во случај на фронтален судир и да се спречат повредите поради контакт со внатрешни делови од автомобилот;
- да одземе голем дел од енергијата ослободена при судир и да ја дистрибуира и дисперзира на појасот и разните делови од телото, ефикасно намалувајќи ги последиците од судирот на поединечните делови на телото;
- да се обезбеди ефикасна заштита на возачите и патниците во комбинација со воздушно перниче и други безбедносни елементи (потпирачи за глава, ергономски седишта, шасија на возилото, и др). Важно е да се истакне дека кај голем дел од современите моторни возила вклучувањето на воздушните перничиња во случај на сообраќајна незгода е условено од користењето на сигурносниот појас.
-Како правилно да го користите и одржувате сигурносниот појас и како правилно да го прицврстите за телото?
За да може целосно да се исползуваат ефектите од сигурносниот појас многу важно е истиот правилно да се користи и затоа важно е да ги знаете следниве детали:
- Горниот дел на појасот се протега преку рамото (не преку вратот), а долниот дел се протега под стомакот и над колковите;
- Вметнете го „јазикот“ – металниот дел од појасот во бравата за закопчување се додека не чуете „КЛИК“;
- Појасот треба да биде прилепен што е можно поблиску до телото, ако тоа не случај, тогаш е потребно дополнително затегнување;
- Појасот не смее да биде заплеткан и лабав.
- Ако возилото учествувало во сообраќајна незгода, сите користени безбедносни појаси треба да се заменат, дури и ако штетата не е видлива.
- Треба да се проверуваат безбедносните ремени повремено за да се утврди потенцијална штета. Не користете агресивни средства за чистење, бидејќи тие можат да го ослабат ременот.
- Специјалните додатоци кои наводно ја зголемуваат удобноста при користење појас спречуваат автоматско затегнување на појасот и затоа се многу опасни. Појасот не е добро затегнат кога користите такви додатоци и на тој начин може да предизвикате сериозни повреди во случај на сообраќајна незгода.
РСБСП со апел: „ Биди паметен! Не заборавај! Возачите и патниците секогаш мора да користат сигурносен појас. Дури и на најкратките патувања.“
