Можноста да играте игри на вашата конзола само со гестови со вашите раце и нозе е импресивна работа, но само на хартија. Имено, Microsoft веќе уште во 2010 година го претстави Kinect, кој им овозможуваше на корисниците подлабоко навлегување во игрите, преку играње со нивното тело. Сепак, и покрај импресивниот почеток (беше најбрзо продаван уред во 2011 година, воопшто), Kinect не успеа и затоа Microsoft денес конечно го згасна производството.
Причина за неуспехот не е самиот уред, бидејќи тој не само што беше пред своето време, туку и функционираше целосно како што кажуваше Microsoft – ги следеше гестовите на играчите со многу малку грешки и мошне прецизно. Сепак, луѓето не го користеа премногу, односно многу повеќе ги користеа џојстиците, бидејќи да бидеме искрени, играњето со мрдање на рацете и целото тело беше мошне заморно.
Поради ова, дивелоперите не ги вградуваа функционалностите на Kinect во своите игри и неколку години по неговото лансирање, многу малку наслови го поддржуваа, односно на нив воопшто и не можеше да се игра со Kinect. Исто така, Kinect се добиваше со доплата, а онаму каде што беше вклучен, ја покачуваше цената на Xbox 360, односно Xbox One во однос на главниот конкурент PlayStation.
Денес, технологијата која се употребуваше во Kinect можеме да ја видиме во новиот iPhone X, чија предна камера може да чита длабински информации и да препознае лице во 3D. Оваа технологија е изработена токму од креаторите на оригиналниот Kinect , PrimeSense. Исто така, многу од технологијата Microsoft ја пресели во импресивниот HoloLens, кој може да прикажува холограми во околината на гледачот.
