Microsoft неодамна конечно ги претстави новите телефони од високата класа, Lumia 950 и 950 XL. Сепак и покрај очекувањата, на настанот за Windows 10 уредите, беше претставен само уште евтиниот Lumia 550, но не и наследниците на Lumia 730/735 и Lumia 830.
Според нови протечени информации од @OnLeak, Lumia 850 не е откажан, туку е одложен за наредната година. На фотографиите се гледа дека за разлика од поскапите 950-ки, овој уред ќе има метална рамка, што е навистина чудна одлука, бидејќи алуминиумот е обично резервиран за телефоните од највисоките класи. Lumia 850 ќе биде и исклучително тенок – само 6,9 милиметри, што го прави еден од најтенките Lumia телефони. На овие информации се надополни и попознатиот @evleaks, според кој уредот ќе има златна рамка и златно Microsoft лого.
Иако нема потврдени информации за перформансите на новата Lumia, според некои информации процесорот ќе биде Snapdragon 410 со четири јадра, помогнат од 1 GB рам и 16 GB простор за складирање податоци. Ова не е голем напредок во однос на претходникот и процесорот е особено слаб со оглед на класата во која се наоѓа. Искрено се надевам дека Microsoft ќе се одлучи на Snapdragon процесор од серијата 600 и барем 2 GB рам, кој е веќе норма во средно – високата класа, иако Windows 10 би требало да работи добро и со послаб процесор.
Камерата пак би требало да биде преземена од Lumia 830, што значи дека ќе има 10 мегапиксели и ќе биде развиена од Pureview тимот. Дисплејот и натаму ќе има 5 инчи и HD резолуција, што е исто така просечно со оглед на класата, додека батеријата би требало да има 2650 mAh.
Lumia 850, заедно со најавениот 750, би требало да бидат претставени во првата половина на наредната година.
Извор: Ubergizmo, GSMArena, WMPowerUser
