Во истата недела кога Google ја најави новата функција кај YouTube Music за креирање на сопствена радио станица, конкурентот Spotify излезе со своја верзија на оваа можност.
Функцијата кај Spotify е едноставно наречена DJ и истата е замислена да функционира како личен „диџеј“ за корисниците. Тоа што посебно ја издвојува DJ функцијата е вештачката интелигенција од OpenAI, нешто што почнавме да го гледаме како се интегрира во многу други производи.
„Подготвени сте за сосема нов начин да слушате на Spotify и уште подлабоко да се поврзете со изведувачите што ги сакате? Диџејот е персонализиран водич со вештачка интелигенција кој толку добро ве познава вас и вашиот музички вкус што може да избере што да ви пушти.“ – истакнуваат од Spotify.
Како што може да се претпостави, диџеј функцијата е тука да ви пушти музика без да треба многу да размислувате што ви се слуша, а таа музика да е баш таа што ви со допаѓа. Со тек на време и давање на насоки на вештачката интелигенција, овие предлози за слушање ќе станат се подобри.
Spotify DJ не е само уште една од многуте „плејлисти“ кои ги има на сервисот и кои се направени врз основа на историјата на слушање. Поради вештачката интелигенција, а и луѓето во Spotify, се прави уште подобра листа на музика која се пушта.
Додатно, диџејот е направен со посебен глас кој додека се слуша музиката како и вистинските диџеи коментира и објаснува што следи и зошто е тоа избрано. Корисниците можат да му кажат на диџејот доколку нешто не им се допаѓа и со тоа да го подобрат своето корисничко искуство.
За почеток Spotify DJ е достапен во бета форма и само за корисниците во САД и Канада. Нема информација кога може да се очекува во остатокот од светот, а познато е дека им е достапен само на претплатниците, но не и на корисниците на бесплатната форма на апликацијата.
