Покрај по изборот на содржина за гледање и фактот дека овој сервис е првиот кој ги популаризира ваквите сервиси, Netflix се познати и по користењето од повеќе корисници со една претплата. Ова се случува поради тоа што најскапата претплата овозможува креирање на четири различни профили за гледање, нешто што сепак од компанијата повеќе го имаат замислено како предност при гледање од истото семејство.
Минатиот месец можевме да прочитаме дека од Netflix сакаат некако да стават крај на оваа практика, па споделувањето на лозинката да се прави само помеѓу корисници кои навистина живеат заедно. Не беше баш јасно како од компанијата ќе ја изведат промената, а за истата се дозна од корисници кои почнале да добиваат известување и барање за верификација со добивање на код.
Сепак, изгледа ова нема да биде целосно воведено, барем на наскоро. Од компанијата истакнаа дека тие ќе продолжат да имаат „полабав“ пристап кон ваквата појава, па иако тоа не го кажаа баш директно, корисниците ќе можат да продолжат да го користат сервисот без проблем.
Доколку некогаш нешто се преземе околу оваа работа, од Netflix истакнуваат дека тоа би го направиле на начин кој би бил јасен за корисниците, односно би разбрале што и зошто се прави.