Една од работите по кои е познат Netflix е споделувањето на лозинката од сопственикот на сметката со други луѓе. На тој начин корисниците поминуваат поевтино, односно се плаќа само една претплата која ја делат луѓето кои се имаат договорено.
Според правилата на Netflix ова не е дозволено, односно од компанијата дозволуваат споделување на лозинката само со членови од семејството, иако не е јасно како тие тоа го контролираат, а до сега тие и немаат ништо преземено.
Најверојатно со големата конкуренција која сега е достапна и големите трошоци за оригинална содржина, Netflix сака тие што гледаат од нивниот сервис, за истиот да плаќаат.
Одредени корисници веќе добиваат известување дека тие не се сопственик на сметката и дека треба да пратат код за да можат да продолжат со гледање. Ова може да се каже и дека е повеќе поврзано со злоупотребата на сметките, а корисниците кои ја делат сметката лесно ќе може да го потврдат кодот.
Доколку не можат да испратат код, корисниците нема да може да ја гледаат содржината и од нив се бара да креираат сопствена сметка.
Оваа новина уште не е официјална, па останува да видиме дали и што ќе преземе Netflix за големиот број на гледачи кои сепак не плаќаат за нивниот сервис.
Инаку, најголемиот пакет на Netflix вклучува до 4 корисници во исто време, со 4 различни профили за секој од нив.