Atom чиповите на Intel последниве неколку години беа апсолутно уништени од ARM конкуренцијата, за што веројатно најмногу крив беше токму Intel, кој редовно каснеше со лансирањето на нови чипови и од година во година заостануваше во перформансите.
Новите T5500 и T5700 Atom процесори базирани на Goldmont архитектурата треба да го променат тоа, но тие нема да се вградуваат во истите уреди како досега, односно телефоните, таблетите и малите лаптопи и „2 во 1“ уреди. Поточно, Intel целосно се откажа од смартфоните, додека за останатите уреди лансираше нови Celeron и Pentium процесори од Apolo Lake генерацијата.
Intel почна во големо да вложува во IoT уредите и новите Atom чипови се наменети токму за нив, а благодарение на можноста за енкодирање на 4K видео сигнал и за вградување во преносни VR уреди за гледање на виртуелни содржини. Во споредба со нивните претходници, новите Atom чипови нудат преку 50% повисоки перформанси, што е навистина респектабилно и што ќе им овозможи да бидат покорисни токму за мултимедијалните содржини.
Од друга страна, новите процесори ќе имаат малку повисока потрошувачка на енергија, што веројатно и нема да биде проблем за уредите за кои ќе биде наменет. Новите процесори поддржуваат и камери со 60% повисоки резолуции, што може да биде многу важно доколку некој ваков чип се вгради во уред за изменета реалност, заедно со RealSense технологијата.
Intel лансираше и мини компјутер за дивелоперите, наречен Joule, кој е базиран на овие процесори и кој е своевидна моќна верзија на Raspberry Pi 3. Тој има 3/4 GB рам, 8/16 GB простор, Bluetooth и Wi-Fi и цена од 369 долари.
Извор: FOX Business, Computer World, Liliputing, Anand Tech
