Денес скоро секој производител има гејмерски подготвени компјутери, а нив отсега им се приклучува и HP, кој ја враќа популарната Omen линија што ја презема од VoodooPC во 2006 година.
Поточно, HP ја поднови линијата со два нови лаптопи и еден десктоп компјутер. Лаптопите имаат големина од 15,6 и 17,3 инчи и избор на процесори од Skylake линијата на Intel. Најмоќен во понудата ќе биде Core i7-6700HQ, што значи дека се работи за помоќните чипови, а не оние штедливите кои се наоѓаат во послабите лаптопи.
Корисникот ќе може да ги конфигурира лаптопите со максимум 16 GB рам меморија и Nvidia GTX 965M графичка картичка, која ако бидеме искрени и не е нешто особено моќна и е наменета пред се за полесен гејминг. Дисплеите ќе бидат достапни со Full HD и Ultra HD резолуција, но не очекувајте овој вториот модел да може да пушти многу игри на Ultra HD – графиката едноставно не е доволно моќна. Omen лаптопите почнуваат од 900, односно 980 долари и доаѓаат со вграден Windows 10.
Десктоп компјутерот пак нема да го има тој проблем – ќе може да се конфигурира со Nvidia GTX 1080, односно AMD R9 390X, кои се најмоќните графички на двата најпознати производители во моментов. Најмоќниот процесор во понудата пак е Core i7-6700K на 4 GHz, додека компјутерот може да се конфигурира и со 32 GB рам меморија, 512 GB SSD диск и 3 TB HDD диск. Стилски дизајнираниот десктоп има и нова USB Type-C 3.1 порта, покрај стандардните USB 3.0 и USB 2.0 порти.
Благодарение на сите овие перформанси, HP вели дека овој компјутер е подготвен за VR играње со HTC Vive, но и со Oculus Rift, иако тоа не е спомнато. За оние кои се за покласичен гејминг, HP Претстави и монитор со големина од 32 инчи и резолуција од 2560х1440 пиксели, кој има вграден FreeSync технологија за помазно движење, а која работи со графичките на AMD.
Извор: PCWorld, ARSTechnica, The Verge
