Многумина од Вас можеби не го почувствувале ова, но лично, како човек кој секојдневно се движи во сервис за автомобили, се случува да не можам да најдам некој алат или пак да се подлизнам на истечено масло. Ова се работи кои со малку поголемо внимание можат да се избегнат, но не целосно. Затоа, Microsoft разви специјален систем со вештачка интелигенција, кој со помош на камери може да ја препознае сцената и сите околни предмети.
На пример, со помош на смартфон, работникот ќе може да добива нотификации од системот на камери поставен во некоја работилница за истечена опасна хемикалија, масло или која и да било друга појава која би можела да го спречи производствениот процес. Исто така, системот овозможува и да му се поставуваат прашања преку Cortana, како на пример каде има некој одреден алат или пак некој колега/колешка.
Овој систем на Microsoft секако се базира на вештачка интелигенција и длабоко учење на околината и е комбинација на Azure stack, Azire IoT Edge и Microsoft Cognitive Services. Microsoft планира да го понуди на голем број на компании, кои ќе можат потоа да го доразвијат зависно од потребите, односно зависно од тоа со што се бави компанијата. Поточно, бидејќи се работи за вештачка интелигенција, овој систем може многу лесно да се проширува и подобрува.
Ваков сличен систем наменет за подобрување на животот во еден град има NVidia, кој е наречен Metropolis и кој делува можеби уште поимпресивно, но со себе носи огромни прашалници за заштитата на приватноста на луѓето.
Извор: The Next Web, Windows Central, Digital Trends
