Apple е најголемиот производител на хардвер во последниве 10-тина години, но тоа не значи дека сите делови кои се вградуваат во нивните уреди се нивно производство. Напротив, Apple користи многу различни добавувачи. Еден од нив е Imagination Technologies, компанија која произведуваше графички чипови за Apple (PowerVR), но со која гигантот веќе го раскина договорот за соработка.
Од Imagination Technologies велат дека причината за ова е што Apple сам ќе ги произведува и развива истите чипови. За досегашниот производител на тие чипови ова е многу лоша вест, бидејќи тие загубија 69% од приходите. Од друга страна, за Apple ова е шанса да исцеди уште некој долар повеќе од iPhone, Apple Watch и iPad, уреди кои се веќе познати како најпрофитабилни на пазарот.
Сепак, има и друга страна на приказната. Imagination Technologies поседуваа низа на патенти за графички чипови и според нив, скоро невозможно е да се дизајнира нов графички чип, со целосно нова архитектура, без да треба да се имплементираат дел од нивните патенти. Доколку Apple не може да постигне да дизајнира таков чип без да ја наруши индустриската сопственост на Imagination Technologies, тие веројатно ќе треба да плаќаат за секој произведен чип.
За купувачите ова не би требало да значи многу. Apple е посветен на произведување и развивање на уреди кои немаат компромиси и не би требало да се случи нивните нови уреди да имаат проблем со графичките перформанси, независно од тоа кој ќе го прави чипот. Но, како и секогаш, само времето ќе покаже.
