Како и со првиот Android телефон на канадската компанија, веројатно уште многу пред лансирањето на вториот таков модел ќе ги дознаеме сите детали за него. Ова се првите протечени фотографии и информации за BlackBerry Vienna.
Кодното име на телефонот веројатно ќе биде сменето кога тој ќе пристигне на пазарот, но од сликите (односно рендерите, не се фотографии од физички модел) може да се види дека за разлика од Priv, овој модел нема да има лизгач, односно тастатурата ќе биде цело време изложена. Ова би требало да им се допадне на оние на кои им недостасуваат класичните BlackBerry телефони со тастатура, но искрено не верувам дека такви ги има премногу.
Целосниот дизајн е модернизирана верзија на она што го гледавме од BlackBerry последниве неколку години, со многу елементи преземени од Porsche верзиите, кои придонесуваат за поелегантен и полуксузен изглед.
Како и да е, телефонот ќе треба да има инсталиран Android, веројатно новиот Marsmallow, а како и Priv ќе има неколку подобрувања за заштита на приватноста на корисникот, особено во делот за повиците, email и SMS пораките.
Засега нема информации за спецификациите на телефонот, но бидејќи Priv е знаменосецот, овој би требал да е модел од средната класа. Vienna би требал да пристигне во првата половина на наредната година.
Исто така, самото тоа што веднаш по претставувањето на Priv, гледаме информации за друг Android модел е показател дека BlackBerry целосно ќе се префрли на еко системот на Google во иднина.
Извор: Android Community, Venture Beat, Techno Buffalo
