Windows 10 Mobile се’ уште бавно се прифаќа од другите производители на смартфони, а многу од нив не ги привлече ниту Continuum можноста, која овозможува користење на телефонот како целосен Windows 10 компјутер. Сепак, Acer неодамна најави дека ќе го скрши мразот, а плодот на тоа во продавниците ќе го видиме во Февруари.
Ние веќе пишувавме за овој модел, кој беше најавен уште во Октомври. Се работи за модел од високата класа, со Snapdragon 808 процесор со шест јадра, 3 GB рам меморија, 32 GB простор за складирање податоци со можност за проширување преку micro SD картичка и 5,5 инчен AMOLED дисплеј со Full HD резолуција и 2.5D Gorilla Glass стакло.
Jade Primo има и USB Type-C приклучок, кој со помош на Windows 10 Mobile, се претвора во конекција со која на телефонот ќе може да се користи Continuum, односно целосно Windows 10 десктоп искуство со приклучување на голем дисплеј.
Камерите, барем на хартија, делуваат импресивно – задната има 21 мегапиксел и две LED светилки, додека предната има одлични 8 мегапиксели со широк агол на леќата, за да може да фати поголема група на луѓе во селфи фотографиите.
И покрај тоа што се работи за ветувачки модел, Acer Jade Primo има и една голема слабост – цената, барем во Африка, изнесува 569 евра, што е навистина многу за производител кој се уште се нема пробиено на смартфон сцената и дури и повеќе од главниот конкурент Lumia 950, кој секако има поголеми шанси на пазарот.
Кога беше најавен во Октомври, Acer објави дека телефонот ќе доаѓа со вграден Continuum систем, кој се состои од USB Type-C адаптер, тастатура и маус. Доколку Acer го потврдеше нивното присуство во пакувањето вклучено во оваа цена, тогаш таа и би била оправдана, но искрено не вложувам надежи во тоа.
Извор: Windows Central, GSMArena, AnandTech
