Таканаречениот нов Microsoft Edge кој од компанијата решија да го развиваат на отворениот Chromium код, наместо со нивната технологија, стана официјално достапен во финална верзија за сите корисници од 15-ти јануари оваа година.
Од тогаш, сите заинтересирани можат да го симнат Edge од страната на Microsoft, по што тој прелистувач ќе ја замени старата верзија, преземајќи ги омилените страни и одредени прилагодувања.
За тие кои што го немаат до сега тоа направено, Microsoft Edge автоматски ќе биде инсталиран, односно надграден, преку Windows Update. Надградбата ќе биде постепено пуштана за сите корисници на Windows 10 1803 верзијата, па до најновата.
По овој процес, веќе не е можно инсталирање на старата верзија која веќе и не се развива, а не гледаме ни причина зошто некој тоа би сакал да го направи.
Microsoft Edge направен на Chromium е компатибилен со повеќето страни, а тоа е поради големата популарност на Chrome, па програмерите во главно развиваат со овој прелистувач во преден план.
Исто така, корисниците можат да ги инсталираат сите достапни додатоци од Chrome Web Store продавницата, па веќе Edge нема проблем со недостаток на додатоци.
Доколку не ви се чека на Windows Update, а сепак сакате да го пробате новиот Edge, финалната верзија можете да ја симнете преку овој линк.
