Google работи на нова функција во нивната Google Health Studies апликација која на корисниците може да им донесе повеќе информации за квалитетот на нивното спиење. Според информациите, оваа функција моментално им е достапна на вработените во компанијата, па не е познато дали и кога ќе им стане достапна на сите корисници.
Се верува дека сигурно би ја добиле корисниците на Pixel телефоните, а подоцна достапноста може да биде проширена на сите Android уреди.
До информацијата за новата функција доаѓаат од 9to5Google, кои го имаат разгледувано кодот на најновата верзија од апликацијата на Google.
Тие имаат откриено дека Android телефоните би можеле да го следат рчењето и кашлањето на корисниците за време на спиењето, како дел од функцијата за мерење на спиењето.
Со ова корисниците би можеле да добијат подобра претстава за квалитетот на спиењето, а овие две мерки се важни за откривање на проблеми при спиењето, но и повеќе.
Поради запазување на приватноста на корисниците, следењето на рчењето и кашлањето, кое мора да се прави преку микрофонот на уредот, ќе се прави само локално, односно звуците нема да се испраќаат на серверите на компанијата.
Доколку оваа функција им биде пуштена на сите корисници, се очекува дека истата ќе биде вградена во Google Fit апликацијата или во делот од часовникот кој е наменет за следење на спиењето.
Инаку, повеќе апликации вакво нешто нудат одамна, па корисниците кои би сакале да знаат дали рчат кога спијат, тоа можат да го направат.
