Кај нас веќе добро познатиот Xiaomi, во Кина лансира нов модел на телефон, кој носи исклучително добри перформанси, огромна батерија, солидни камери и сето тоа по цена по која кај нас може да се купи само телефон со помал дисплеј и прилично слаби перформанси.
Однадвор, дизајнот можеби потсетува на iPhone, но во задниот дел има посебна шема со баклави, која е веројатно доволна за да го дистанцира од неколку пати поскапиот конкурент. Телото е инаку изработено од алуминиум, што секако не е нешто што се очекува од еден толку евтин смартфон.
Дисплејот има големина од 5 инчи и HD резолуција, што е прилично стандардно во средната класа, но за разлика од конкурентите со иста цена, тука пикселите ќе ги движи прилично моќен Snapdragon 616 процесор со осум јадра, помогнат од 2 GB рам меморија и 16 GB простор за складирање податоци, со можност за проширување преку micro SD картичка.
Голем адут на Redmi 3 ќе биде и батеријата, која има капацитет од 4100 mAh и покрај тоа што телото има дебелина од само 8,5 милиметри. Со оглед на чипот, големината на дисплејот и оптимизациите во новиот MIUI OS на Xiaomi, батеријата би требала да издржи прилично долго време со едно полнење – сигурно до два дена.
Камерите се исто така импресивни за толку евтин уред – задната има 13 мегапиксели и f/2.0 бленда, додека предната има 5 мегапиксели и f/2.2 бленда, а и двете камери можат да снимаат Full HD видео.
Како и скоро секој модел од Кина и овој ќе има можност за две SIM картички (во тој случај едната го зазема местото на micro SD картичката).
Xiaomi Redmi 3 ќе биде претставен во Кина и засега ќе се продава само на тој пазар, по исклучително поволна цена од 107 долари. Доколку има интерес, Xiaomi е подготвен овој модел да го понуди и на другите пазари низ светот, но очекувајте тогаш цената делумно да се покачи.
Извор: The Next Web, Engadget, Android Central