Иако сега за сега Windows како мобилна платформа не е нешто посебно популарна кај корисниците, информациите за претставување на Surface Phone привлекува многу повеќе внимание.
Причината за тоа е успешноста на Surface линијата на производи, засега составена од лаптоп и таблет компјутер, кои се карактеризираат со одлична изработка и дизајн. Истиот тим се верува дека е задолжен за дизајнирање и развој на Surface телефонот, па се очекува и тој уред да биде направен како останатите уреди, а надежите се дека ќе го има и сличниот успех.
Дека се работи на развој на овој телефон е скоро сигурно. Премногу информации имаат излезено изминатиот период за да се покажат како погрешни, а можно е само откажување на плановите.
Последната информација го ставаше претставувањето на Surface Phone за втората половина од оваа година, меѓутоа според извори на Windows Central, плановите се одложени, па доколку се случи вакво претставување, треба да го очекуваме за почетокот на 2017.
Windows Central исто така најавуваат дека телефонот ќе дојде во три различни варијанти, а со тоа и три различни целни групи на корисници, односно за обични корисници, за бизнис корисниците и ентузијастите.
Како причини за одложување на и така неофицијалниот телефон се наведуваат дополнителното довршување и „пеглање“ на оперативниот систем, како и претставувањето на нови чипови од Intel.
Се чини тешко дека Microsoft или било кој друг ќе успее да направи нешто да ги загрози позициите на Andorid и iOS, но пазарен удел од над 5% би бил доволно добар за да го задржи Windows како доволно сериозна алтернативна платформа, ако не за сите, барем за бизнисите и ентузијастите.
Извор: Windows Central, VB