Новите S7-ки на Samsung се можеби отпорни на вода и прашина, но не и на паѓања и удари – за тоа, тука отсекогаш биле Active моделите во Galaxy S серијата, кои за прв пат беа претставени со S4. Според информација од “Level” апликацијата на Samsung, која е своевидна листа на компатибилни слушалки и звучници на Samsung со нивните паметни телефони, S7 Active треба да пристигне многу наскоро.
Информацијата доаѓа директно од Samsung, па затоа и можеме да ја сметаме како скоро официјална. Сеуште нема детални спецификации за телефонот, но тие сигурно ќе бидат многу слични во однос на обичната S7-ка, како што беше случајот со Active моделите и досега, со единствена разлика во дизајнот, кој ќе има многу гума и пластика на него за подобрена заштита од удари.
Поточно, Super AMOLED дисплејот ќе има големина од 5,1 инч и Quad HD резолуција од 2560х1440 пиксели, процесорот ќе биде или Exynos 8890 или Snapdragon 820, а и двата ќе бидат помогнати од 4 GB рам меморија и 32 GB простор, со можност за вградување на micro SD картичка. Задната камера има 12 мегапиксели и снима 4K видео, додека предната има 5 мегапиксели и може да снима Full HD видео.
Покрај тоа што Active моделот ќе биде многу поотпорен на паѓања, би требало да може да издржи и подлабоко од 1,5 метар под вода, колку што е максимумот на обичниот Galaxy S7. Исто така, ако ги земеме досегашните Active модели како пример, батеријата ќе биде многу поголема – обичниот модел има 3.000 mAh, па тука може да очекуваме батерија со капацитет од скоро 3.800 mAh.
Сите овие „претпоставени“ спецификации ќе можеме да ги потврдиме многу наскоро, заедно со финалниот дизајн на телефонот (на насловната фотографија е актуелниот Galaxy S6 Active).
Извор: TechnoBuffalo, Engadget, The Verge
