По одложувањето на почетокот на продажбата, Mate X почна да се продава во Кина минатиот месец, а веќе имаме најави за претставување и на втората генерација од овој телефон со екран кој се превиткува.
Според информациите кои беа достапни и досега, овој модел ќе биде надградба на првиот, односно не целосно нов уред со нов дизајн и нови можности.
Потврдата дека од компанијата планираат претставување на ваков уред доаѓа и директно од директорот за потрошувачки производи на Huawei, Ричард Ју. Тој во разговор за порталот Frandroid открива неколку детали поврзани со наследникот на Mate X.
Според него, новиот Mate X ќе дојде со подобрен систем за преклопување, односно со подобрена шарка, која е клучна за подолгорочното работење на уредот.
Покрај тоа, уредот ќе добие и поцврст екран, нешто што е проблем кај овие уреди поради тоа што не може да се користи класично стакло, односно Gorilla Glass. Поголемата цврстина, а посебно кај Mate X кој екранот секогаш е отворен спрема надвор, е нешто што сигурно ќе биде добредојдено за корисниците.
На крај, Mate X од идната година ќе дојде со побрз процесор, односно се најавува користење на Kirin 990, нешто што реално можеше да се вклучи и во годинешниот Mate X, меѓутоа од компанијата сепак не се решија за таков чекор.
Во разговорот, било најавено и дека се планира пуштање во продажба во Европа на годинешниот Mate X, кој засега е достапен само во Кина, а исто така се најавуваат и подобрувања кај камерата, како и во перформансите кај P40.