Индиската влада сака да направи промена на состојбата на пазарот на мобилните оперативни системи каде никогаш не успеа да се пробие трет играч, оставајќи го пазарот на Google, со партнерите и Apple, односно на Android и iOS.
Министерот за Електроника и ИТ Раџив Чандрасехар најави дека владата разгледувала можност за промена на законите со цел да се развие мобилен оперативен систем. Тие за таа цел ги разгледувале можностите кај стартап компаниите, како и во образовните институции.
Засега не е познато дали воопшто би дошло до заклучок дека развој на алтернативен мобилен оперативен систем на двата кои го држат пазарот е возможно и остварливо. Сепак, доколку тоа се случи, односно се почне со развојот, дефинитивно ќе го привлече нашето внимание.
Повеќе компании имаат пробано да ја нарушат доминацијата на Google и Apple на пазарот, па тоа не му успеа дури ни на Microsoft, иако голем дел од причината за тоа е и недоволниот труд од компанијата.
Според нас, тешко е да се очекува реален конкурент на Android и iOS, па доколку индиската влада се одлучи да продолжи со еден ваков проект, тој единствено би можел да има одреден успех во Индија.
