Како што беше најавено, AMD оваа недела ја претстави својата најновата генерација на десктоп процесори, Ryzen 5000 серијата. Овие процесори се направени на најновата Zen 3 архитектура, која како и претходната е направена во 7nm технологија, за што AMD веќе одреден период добива предност во споредба со Intel кои уште чекаме да ја претстават нивната 10nm архитектура.
Од новата Zen 3 технологија, иако е исто така направена на 7nm како и претходната, сепак може да се очекуваат подобрени перформанси, односно како што истакнуваат од AMD, редизајнирана поставеност на јадрата, поголема максимална брзина при „boost“ и слично.
Новата Ryzen 5000 доаѓа со четири нови процесори, односно Ryzen 9 5950X, Ryzen 9 5900X, Ryzen 7 5800X и Ryzen 5 5600X. Цените на процесорите почнуваат од 299 долари, па одат до 799 за најсилниот модел во серијата. Продажбата на новата 5000 серија од Ryzen корисниците можат да ја очекуваат од идниот месец.
Овие нови процесори почнуваат со 6 јадра и 12 „тредови“, па се до 16 јадра со 32 „тредови“ кај Ryzen 9 5950X моделот. Фреквенцијата на која работат процесорите е од 3,4 до 3,8 GHz, а може да се засилат до 4,9 GHz. Ова е нешто послабо од тие на Intel процесорите, но секако не е се во оваа карактеристика, како што исто така не е се до архитектурата.
MODEL | CORES/ THREADS | TDP (Watts) | BOOST/BASE FREQ. (GHz) | TOTAL CACHE |
---|---|---|---|---|
AMD Ryzen™ 9 5950X | 16C/32T | 105W | Up to 4.9 / 3.4 | 72MB |
AMD Ryzen™ 9 5900X | 12C/24T | 105W | Up to 4.8 / 3.7 | 70MB |
AMD Ryzen™ 7 5800X | 8C/16T | 105W | Up to 4.7 / 3.8 | 36MB |
AMD Ryzen™ 5 5600X | 6C/12T | 65W | Up to 4.6 / 3.7 | 35MB |
Од AMD го истакнуваат и Ryzen 9 5900X процесорот како најдобриот процесор во светот за гејминг, а директно го споредуваат со i9-10900K од Intel.
Инаку, за крајот на овој месец се очекува AMD да ги претстави и нивните нови графички картички направени во новата RDNA 2 архитектура за кои се најавува дека ќе им конкурираат на новите RTX 3000 графички од Nvidia.
Ова претставување од страна на AMD веќе се гледа како причина за најавата од страна на Intel дека нивната 11-та генерација на десктоп процесори ќе бидат претставени на почетокот од идната година.