Со оглед на големиот пад на популарноста пред се на главните модели од Samsung, не е воопшто изненадувачки да дојде и до губење на првата позиција во светот. Проблем во точното мерење на овие статистики доаѓа од тоа што компаниите не секогаш ги објавуваат точните бројки за продажбите, посебно ако не се како што би сакале.
Дека Apple ги има поминато Samsung веќе можевме да прочитаме од две други агенции кои што работат со истражување на пазарот. Овој пат ваквата информација доаѓа од агенцијата Gartner според која што Apple има продадено повеќе паметни телефони во последната четвртина од минатата година и со тоа го има превземено првото место од Samsung.
Според нивните статистики, Samsung истиот период во 2013 година има продадено 83,3 милиони уреди, додека Apple во истиот период имале продадено 50,2 милиони уреди. Како и да е, во последната четвртина од 2014 година доаѓа до целосен пресврт, па Apple продава дури 74,8 милиони уреди за разлика од Samsung кои што имаат продадено 73 милиони.
Разликата можеби и не е толку голема, истата беше претпоставувана и од другите агенции, но сепак го покажува трендот на пазарот. Новите модели на Apple од минатата година се покажаа како вистински хит меѓу корисниците, додека Samsung трпеше критики и со тоа пад на продажбите.
Малата разлика помеѓу двете компании ја прави интересна ситуацијата за следење оваа година. Samsung оваа недела ги претстави своите нови адути на пазарот кои што сега за сега добиваат одлични критики за разлика од ланскиот модел. Galaxy S6 моделите се направени од поквалитетни материјали, односно не ја вклучуваат карактеристичната за претходниците пластика, а исто така променет е и дизајнот.
Покрај статистиките за овие два производители, од Gartner истакнуваат дека минатата година била помината границата од 1 милијарда продадени паметни телефони од сите производители. Се работи за скоро 30 процентно зголемување во однос на 2013 година кога вкупно продадените уреди биле нешто под милијарда, а во 2014 година таа бројка изнесува скоро 1,3 милијарди уреди.
