Јасно е веќе одамна колку е голема популарноста на форматот на кратки видеа кој го започна TikTok, а сега го има кај Instagram, Facebook, а и по уште некоја друга апликација.
Spotify се приклучува на овој тренд, а слободно може да се каже дека тоа одлично го имаат изведено, без да се промени основниот изглед на апликацијата и без наметнување на форматот.
Конкретно, апликацијата сега има нов начин за откривање на нова музика, односно музика која би сакал корисникот да ја слуша, преку нов дел кој прикажува кратки исечоци од песните во вертикална форма која може да се разгледува „бесконечно“.
Во овој нов формат вградена е и комбинација од Stories, односно пред да се продолжи „надолу“ неколку песни од иста категорија се прикажуваат како овој исто така познат формат.
Кога ќе наидат на нешто што им се допаѓа, корисниците можат да притиснат да ја слушаат цела песна од почеток, целиот албум или „плејлиста“, а можат и да ја зачуваат, како и да ја споделат со пријателите.
Овој нов формат за откривање на содржина не е ограничен на музиката, па може да се користи и за подкасти, како и за аудио книги, таму каде што се достапни.
За корисниците од САД и Канада, вградена е и новата DJ функција која со помош на вештачка интелигенција треба да ги „имитира“ порано стандардните диџеи по радијата.
