Facebook оваа недела го имаше, според информациите, досега најголемиот прекин на своите сервиси, а на тоа посебно додаде фактот што беа опфатени сите сервиси во сопственост на компанијата (Messenger, Instagram, WhatsApp).

За периодот додека траеја прекините на овие сервиси, конкурентниот и популарен сервис Telegram има забележано скок во бројот на нови корисници. Според основачот на компанијата Павел Дуров, во 24те часа кога Facebook имаше проблеми, Telegram има добиено 3 милиони нови корисници.

Оваа информација Дуров ја пренесе преку неговиот Telegram канал, а истата гласи:

„Гледам 3 милиони нови корисници се имаат пријавено за Telegram во изминатите 24 часа. Добро. Ние имаме вистинска приватност и неограничен простор за сите.“

Инаку Telegram е апликација за разговори која ја доби својата популарност по нејзината забрана во неколку земји, меѓу кои и Русија, поради одбивање да се овозможи пристап до шифрираните разговори преку неа.

Сепак, Telegram исто така добива и критики изминатиот период, поради користење на затворен код за шифрирање, па не може со сигурност да се потврди неговата приватност од независните институции кои работат со проверка.