Solar Impulse 2, авионот напојуван само од сончева енергија и кој го започна својот пат околу светот во март минатата година, денеска успешно ја заврши мисијата со слетување во Абу Даби, од каде што и полета.
Целта на развивачите на овој авион е да покажат дека поголемиот дел од работите кои денеска масовно ги користиме, можат без проблем да работат на енергија од обновливи и еколошки извори.
Solar Impulse 2 на себе има повеќе од 17.000 сончеви панели од кои се полнат батериите на леталото. Како и што би се очекувало, преку ден панелите се користат за полнење на батериите, но и за придвижување на леталото, кое што потоа продолжува навечер да лета само на батерии.
Со оглед на малата брзина којашто ја постигнува леталото од максимални 140 км/ч, а лета со многу помала брзина обично, распонот на неговите крилја е огромен, поголем и од тој на Боинг 747.
Во воздух леталото може да остане повеќе денови, а може слободно да се каже дека ова ограничување повеќе зависи од пилотите кои сепак не може да останат долго време во малата кабина каква што има моментално оваа верзија од леталото.
За време на овие година и повеќе, Solar Impulse 2 помина низ повеќе земји во светот, а се разбира ги прелета и некои од океаните. Точната рута на летот најдобро може да се види на сликата погоре.
Извор: The Guardian, TNW