Google Maps е еден од најмногу користените сервиси на Google, кој може слободно да се каже дека направи револуција во „истражувањето“ на Земјата. Оваа недела овој сервис добива неколку промени кои дополнително ќе го подобрат корисничкото искуство, но и корисноста на самиот сервис.
Главната промена која ја добива Google Maps е новиот изглед. Како што истакнуваат и од компанијата, тргнати се одредени елементи од корисничкиот интерфејс кои искуството покажало дека не се потребни.
Промените веднаш за забележуваат, а истите вклучуваат промена на боите на мапите, односно прикажувањето на улиците, околината и слично. Може да се каже дека сега мапите делуваат попријатни за гледање, а со тоа и наоѓање на тоа што корисникот го бара.
Променети се исто така и фонтовите кои се користат за означување на местата, а според Google, заедно со промените во изгледот на мапите, имињата на улиците, градовите, местата на интерес, сега ќе може многу полесно да се видат, односно ќе бидат повеќе издвоени.
Покрај оваа промена во изгледот, Google Maps сега вклучува и нов начин за полесно наоѓање на места на интерес. Се работи за места кои што од Google сметаат дека би ги интересирале корисниците. Тие вклучуваат популарни места, хотели, кафулиња и слично.
Тие на мапата ќе бидат означени со портокалова боја, а како зумирате на мапата, поточно ќе бидат истакнувани.
Боите на мапите генерално се променети со цел за подобро истакнување на различни видови на елементи, односно градби кои ги претставуваат. На следната слика се прикажани различните бои и што тие треба да означуваат.
Новите промени во Google Maps се достапни на мобилните апликации за Android и iOS, како и на веб верзијата достапна преку интернет прелистувач.
Извор: Google
