Најголемиот производител на смартфони во светот спрема ново изненадување за вљубениците во смартфони ширум светот – телефон кој ќе може да се превитка на половина со цел да се намалат неговите димензии. Сега имаме и потврда дека Samsung ќе лансира ваков смартфон и тоа најверојатно наредната година.
Информациите дека Samsung работи на ваков смартфон доаѓаат од Корејската Национална Агенција за истражување на Радио Сигнали, која веројатно ги тестира Wi-Fi и Bluetooth антените на овој смартфон. Всушност, многу телефони досега се протечени токму на овој начин, што дава прилично голема надеж дека ваквиот смартфон може да го видиме многу наскоро.
Со овој телефон Samsung инаку ќе има достоен одговор на iPhone X, смартфонот на Apple кој се уште не е пуштен во продажба, но е многу добро примен од јавноста, пред се благодарение на дизајнот со многу мала рамка околу дисплејот. Да, Samsung веќе има телефони со мала рамка во Galaxy S8, S8 Plus и Note 8, но факт е дека iPhone X изгледа малку поимпресивно, па затоа телефон кој може да се преклопи би бил навистина добредојден во Galaxy портфолиото.
Она што со сигурност треба да го очекувате од овој смартфон е дека ќе биде многу скап – технологијата потребна за да се направи се уште ја нема во широко производство и во моментов веројатно само Samsung може да ги направи истите делови, како на пример дисплејот кој може да се превитка. Затоа, првата генерација на овој телефон очекувајте да биде во помала серија, исто како што е и iPhone X, што секако не го намалува фактот дека ќе биде исклучително многу посакуван смартфон. Лично, нетрпеливо чекам на нови информации за него.
Извор: TechnoBuffalo, Trusted Reviews, BGR
