Фановите на Start Trek добиваат уште една нова серија, иако не можеме да кажеме дека сите нови серии се добри како постарите, а посебно со влијанието на „просветлените“ луѓе кои мора да се вмешаат во се.
Без разлика на тоа, сепак ќе почекаме да излезе серијата, па да видиме дали ќе вреди да се гледа, а продукцијата ќе биде од страна на Paramount+ и ќе започне со снимање идната година.
Новата серија ќе го носи името Star Trek: Starfleet Academy и веднаш може да се види до некаде што може да се очекува. Во најавата за серијата не се дадени повеќе информации, а достапна е само оваа изјава:
„Приемот сега е отворен за Starfleet Academy! Истражете ја галаксијата! Бидете капетан на вашата судбина! За прв пат по повеќе од еден век, нашиот кампус ќе биде повторно отворен за да прима поединци од минимум 16 Земјини години (или еквивалент на видови) кои сонуваат да ги надминат своите физички, ментални и духовни граници, кои го ценат пријателството, другарството, честа и посветеност на кауза поголема од себе. Предметите ќе биде ригорозни, инструкторите меѓу најсветлите светла во нивните области, а прифатените ќе живеат и учат рамо до рамо со најразновидна популација на студенти што некогаш биле примени. Денеска ги охрабруваме сите кои ги споделуваат нашите соништа, цели и вредности да се приклучат на новата генерација питомци визионери додека ги прават своите први чекори кон создавање светла иднина за сите нас. Аплицирајте уште денес! Ex Astris, Scientia!“
Од ова може само да се претпостави во кој период од Star Trek универзумот ќе се случува оваа серија, па најверојатно ќе биде како еден вид на продолжение на Star Trek: Discovery.
Како главни продуценти на серијата ќе бидат Алекс Куртцман и Нога Ландау. Вклученоста на Куртцман остава доста простор за очекувањата од серијата, па за некои тоа е добар знак, додека за други уште сега е јасно дека не треба да се очекува којзнае колку добра серија.
Кај нас не е познато дали ќе може да се гледа серијата, но очекуваме да биде достапна на новиот SkyShowtime стриминг сервис.
