При претставувањето на Windows 10, Microsoft најави дека програмерите од Android и iOS сферата ќе можат многу лесно да ги префрлат своите апликации во Windows 10. Сепак, поради проблеми со перформансите со Android апликациите, само iOS програмерите можат да ги префрлат своите апликации во Windows 10 универзална апликација преку таканаречениот iOS Bridge (кодно име Project Islandwood).
Како што може да се види на видеото подолу, тоа може да се направи за само 5 минути. Да, доколку веќе имате развиено iOS апликација, ќе можете многу лесно, веројатно за не повеќе од еден работен ден, да ја објавите на Windows 10 Store како универзална апликација. Секако, сето ова зависи од нејзината комплексност, но како и да е, ова е многу полесно отколку да се почне од почеток.
Имено, програмерот Давид Бурела успеа да ја претвори iOS играта Canabalt во Windows 10 апликацијата. Тој дури и го користи истиот код и префрлањето го прави само со помош на Project Islandwood, за само 5 минути. Секако, бидејќи се работи за игра, нема потреба од подлабоко поврзување со оперативниот систем – тоа веројатно бара малку дополнителен код, но како и да е, тоа не би требало да биде проблем за поголемиот број на програмери.
Windows 10 маркетот за апликации инаку веќе има преку 200 милиони корисници, бројка која само ќе продолжи да се зголемува, па доколку имате iOS апликација, веројатно вреди да ја објавите и на новиот универзален оперативен систем на Microsoft – прелесно е за да не го направите тоа.
Извор: Windows Central, WM Power User, Trusted Reviews
