Производителот на луксузни паметни телефони Vertu лансира нов рачно изработен модел, за кој иако немаат оформено цена, очекувајте да чини неколку илјадници евра. Дали вреди толку пари може да одлучи само оној кој ќе го купи, но негов главен адут дефинитивно се материјалите од кои е изработен.
Спецификациите се како од смартфон од високата класа претставен во 2016 година. Процесорот е Snapdragon 820 помогнат од 4 GB рам и 128 GB простор со слот за micro SD. Камерата назад има 12 мегапиксели со голем сензор, исто како Google Pixel смартфоните, додека батеријата има капацитет од просечни 3.220 mAh. AMOLED дисплејот има големина од 5,5 инчи и резолуција од 2560х1440 пиксели.
Како и секогаш со Vertu, разочарување е што смартфонот доаѓа само со Android Marshmallow, а не со најновиот Nougat. Сепак, производителот ветува енкриптирани повици преку софтвер на Silent Circle, што може да биде многу значајно за голем дел на купувачите на овој смартфон.
Но, главните адути на телефоните на Vertu никогаш не биле перформансите или пак софтверот. Constellation е рачно изработено парче луксуз со италијанска кожа, англиски алуминиум и предно сафирно стакло од 140 карати. Покрај тоа, со него има посебен сервис кој е достапен 24 часа и бесплатно користење на iPass, која е најголемата Wi-Fi мрежа во светот.
Vertu Constellation има и неколку други адути, како на пример предните стерео звучници со Dolby Digital Plus технологија, читач за отпечатоци и безжично полнење, но многу од нив ги имаат и десетици пати поевтини паметни телефони. Интересно, Constellation има и слот за две SIM картички, исто како евтините кинески смартфони, но многу корисно за неговите корисници.
Цената за овој смартфон се уште не е објавена, но не очекувајте дека можете да си го дозволите. Згора на тоа, не ни препорачувам да потрошите неколку илјади евра на смартфон кој после MWC во Барселона ќе биде веќе застарен, односно ќе има послаби перформанси, камера и застарен софтвер.
Извор: The Verge, GSM Arena, Digital Trends
