Иако главна одлика на Pixel смартфоните на Google е вградениот софтвер, пребарувачкиот гигант најверојатно годинава сака да понуди и хардвер кој ќе одговара на модерниот Android O оперативен систем, кој ќе биде претставен годинава.
Бидејќи тие веќе подолго време соработуваат со LG за развој и производство на Nexus смартфоните, според нови информации, веќе имаат побарано од нив свитливи OLED дисплеи, кои ќе бидат наменети за новите Pixel смартфони. Договорот е инаку со LG Display и покрива градење на нова производствена лента, која ќе може да ги задоволи потребите на Google.
Засега, главниот фокус на LG Display е кај големите телевизори. Всушност, моментално тие се број еден кај овие големи дисплеи за OLED технологија, но кај помалите дисплеи заостануваат зад Samsung. Затоа, соработката со Google и влогот од околу 8 милијарди долари кој го планира американската компанија, можат да значат и влез на LG во светот на преносните уреди. Во моментов, тие прават мали OLED екрани само за паметните часовници на LG и за Apple Watch.
Свитливите дисплеи сепак веројатно ќе пристигнат наредната година, односно Pixel смартфоните кои ќе бидат претставени оваа есен ќе имаат стандардни OLED екрани. Причината е едноставна – градењето на нова производствена лента трае многу долго, а во моментов не е ниту постигнат некаков договор меѓу компаниите.
