Со оглед на досегашното искуство со Microsoft, оваа вест воопшто нема да изненади, но навистина чуди што од компанијата не си ја учат лекцијата и покрај честите големи критики кога ќе направат вакво нешто.
Конкретно, во најновата Dev верзија од Windows 11, некои корисници имаат забележано реклама во File Explorer. Рекламата е дискретна и во текстуална форма само, а го промовира Microsoft Editor, конкурентниот производ на компанијата на познатите Grammarly.
Microsoft се посебно познати по ваквите работи, односно наметнување на одредени нивни производи во Windows, Office и слично, иако ова се платени производи, па нема потребна, логика, ниту оправдание да се прикажуваат реклами.
Работите во тестот не се толку „страшни“. Рекламата сепак е дискретна и се прикажува во делови од File Explorer каде има некаква логика, односно во примерот рекламата за Microsoft Editor се прикажува само кога ќе се отвори Documents папката.
Со оглед на честите критики кои ги добива компанијата кога прави вакви работи, може да се очекува дека оваа новина нема да стане дел од Windows 11 или ќе биде сепак нешто што ретко се прикажува, а сигурно нема да се користи за прикажување на класични реклами од разни компании.
