Производителите кои ќе сакаат да произведуваат паметни телефони со Windows 10 Mobile, нормално ќе треба да задоволат неколку услови. Истите се многу слични со оние за Windows Phone 8.1, но со неколку подобрувања, како на пример можноста за користење на Intel x86 чипови.
Информацијата дека ќе бидат поддржани чиповите на Intel наиде на особено задоволство кај Windows заедницата. Имено, со Continuum можноста, Windows 10 телефоните ќе можат да се користат како компјутер со целосно десктоп опкружување, но со ARM процесор ќе работат само модерните апликации. Со x86 чип можат да работат и старите Windows програми, како на пример Photoshop, што звучи навистина интересно. Ова сепак не значи дека оваа можност ќе биде достапна, но технички не би требало да има некоја поголема пречка.
Од останатите хардверски услови, телефоните ќе мора да имаат дисплеј со големина од 3 до 7,99 инчи и минимум 800х480 пиксели резолуција, минимум 512 MB рам меморија, 4 GB внатрешен простор за складирање податоци и VGA камера. Интересно, Microsoft ги тргна ограничувањата за акцелерометар и Bluetooth, што секако не значи дека ќе има такви телефони со Windows 10.
Најмалите телефони ќе мора да имаат надворешни копчиња за Back, Home и Search, но за телефоните со повисока резолуција (од 854х480 нагоре), истите ќе можат да бидат виртуелно поставени во оперативниот систем. Секако, телефоните ќе мора да имаат и хардверски копчиња за отклучување/заклучување и за контрола на гласноста.
Првите телефони со Windows 10 Mobile ќе бидат лансирани веројатно во Октомври и тоа со сигурност ќе бидат Lumia 950 и 950 XL. Засега нема најава кои други производители ќе се придружат во Windows 10 Mobile еко системот, но има најави дека тоа ќе го направат HTC, Samsung, LG, како и неколку кинески и индиски производители.
Извор: Windows Central, Venture Beat
