Skype излезе со нова редизајнирана апликација која што го унифицира искуството низ сите платформи уште пред некој месец. Меѓутоа новиот дизајн беше достапен само за мобилните телефони, а остана најавата дека и таблет верзијата ќе добие редизајн. Со најновата верзија Skype го остваруваат ветеното, па сега и корисниците на таблет компјутери може да го користат новиот дизајн, кој што е ист како на Windows 8.
Со стартување на апликацијата ќе забележите дека главниот екран е целосно нов. Веќе нема потреба да кликате на категорија која што сакате да ја видите, како на пример, пријатели, последни разговори и слично. Сега сите тие информации се наоѓаат директно на главниот екран, па користењето е доста побрзо и полесно.
Покрај новиот дизајн за таблет компјутерите, новата верзија донесува и подобрен квалитет на видео повиците. Во услови на добра конекција, треба да забележите и до 4 пати подобра резолуција на видеото, со подобрена чистота и квалитет.
Други новини со оваа верзија вклучуваат:
- Подобрување на функциите за пристапност (Accessibility)
- Надградба која ги средува проблемите со дојдовни повици, вклучувајќи го и проблемот што предизвикува рестартирање на телефонот
- Додатни промени во насочување на звукот
- Подобрување на корисничкото искуство при промена ориентацијата на уредот
Новата верзија веќе можете да ја симнете преку продавницата за апликации (Play Store).
