Се шпекулира дека Samsung ќе подрани со најавата на Galaxy S5. Уредот кој се очекуваше да биде најавен во март следната година, можно е да биде претставен уште во јануари, а продажбата на истиот да започне еден месец потоа.
Како главна причина за ова се наведува падот во продажбите на Galaxy S4 по излегувањето на iPhone 5S и 5C, додека улога има и зголемената популарност на HTC One.
Како одговор на конкуренцијата и желбите на потрошувачите Samsung Galaxy S5 се очекува да има метален дизајн наспроти пластичниот кај S4. Засега Samsung е единствениот помеѓу големите производители кој сеуште користи пластичен дизајн за своите водечки модели. Новите материјали со кои се шпекулира се магнезиум и алуминиум.
Исто така, како одговор на Apple се очекува Galaxy S5 да вклучува 64-битен процесор и сензор за препознавање на отпечатоци.
Samsung подготвува и нова камера со подобрен систем на стабилизација на слика и сензор кој ќе се справува подобро во услови на слаба светлина.
Од страна на Samsung засега нема официјална реакција на овие гласини.