Windows 10 оперативен систем кој е достапен на скоро секој уред кој може да го замислиме – него може да го инсталирате на вашиот компјутер, лаптоп и на Raspberry Pi, а го има дури и на Xbox и Windows смартфоните.
Оваа импресивна достапност на Windows 10 наскоро ќе се прошири и кон серверите со “Windows 10 Pro for Workstations”, оперативен систем кој има неколку подобрувања наменети токму за моќните машини.
“Windows 10 Pro for Workstations” ќе има неколку подобрувања во односно на обичниот Windows 10 Pro, кои ќе го направат подобар и поупотреблив на ваквите системи. Првата од нив е “Resilient File System”, односно можноста оперативниот систем да забележи кога некоја од датотеките ќе биде расипана на еден од хард дисковите на кои е копирана и да ја спореди со оригиналната со цел да може да ја поправи. На овој начин, корисниците на оваа сервер верзија ќе бидат сигурни дека нивните податоци ќе бидат подобро заштитени.
Не помалку важно, “Windows 10 Pro for Workstations” ќе може да зачувува податоци и во “persistent memory”, односно своевидна рам меморија која ги зачувува податоците дури и откако ќе биде изгаснат компјутерот. Ова ќе осигура многу, многу поголема брзина на пристап до податоците, дури и споредено со SSD дисковите.
Исто така, во оваа верзија ќе бидат подобрени и перформансите во однос на обичниот Windows 10 при префрлување на поголеми датотеки од еден на друг компјутер на мрежата, бидејќи “Windows 10 Pro for Workstations” има поддршка за мрежни карти кои можат директно да се поврзат со меморијата (Remote Direct Memory Access) и да го ослободат процесорот од оваа задача, што отвора простор тој да се користи максимално за други задачи.
Во очи на нападот на AMD на десктоп сцената, не помалку важна за оваа верзија на Windows 10 е и поддршката за AMD серверските Opteron процесори, покрај веќе постоечката поддршка за Intel Xeon чиповите. “Windows 10 Pro for Workstations” инаку ќе поддржува машини со максимум 4 процесори и 6 TB меморија.
Извор: Mashable, TechRadar, ExtremeTech
