Новата поголема надградба за Windows 10 која треба да пристигне оваа есен, повторно ќе се вика Creators Update, само со „есенска“ во името. Според тоа, таа ќе биде своевидно подобрување на надградбата која беше претставена пред околу еден месец и ќе донесе четири важни подобрувања, кои ќе бидат носители на оваа надградба.
Првото подобрување, кое според мене требаше многу порано да се случи и кое го уживаат корисниците на Mac OS од поодамна е Timeline. Се работи буквално за тајмлајн за тоа што сте правеле на вашиот компјутер во еден даден момент, кој ќе ви овозможи лесно да се вратите на него.
На пример, сте имале сесија во некој прелистувач која сакате да ја продолжите, но сте отвориле неколку сесии после тоа или пак да се вратите на некој документ на кој сте работеле и сл. Ова е буквално начин да имате преглед на сите активности на вашиот компјутер – отсега нема да мора да паметите на кој документ работевте претходниот ден и на кој не можете да се сетите.
Втора поважна функционалност е “Pick Up Where You Left Of”, која е всушност дел од Cortana. Имено, со есенскиот Creators Update, Cortana ќе може да му овозможи на корисникот да продолжи таму каде што застанал, независно на кој уред е, вклучувајќи ги Windows 10 и 10 Mobile, iOS и Android. Поточно, “Pick Up Where You Left Of“ ќе овозможи нешто што сте правеле на вашиот компјутер да продолжите да го правите на вашиот смартфон или обратно. Cortana дури и ќе ве потсети дека сте имале работа започнато на друг уред.
Третата функционалност, која ми е мене омилена е Cloud – powered Clipboard. Со оваа функционалност, корисникот ќе може да прави Copy – Paste на текст, слики или друг тип на датотеки од еден уред на друг. На пример, ќе можете да ископирате текст или слика од вашиот смартфон (Android, iOS или Windows 10 Mobile) и потоа да направите Paste во вашиот компјутер.
На крај, нешто кое веќе го знаевме е “Project Neon”, поточно отсега со ново име Fluent Design System, кој визуелно ќе го подобри изгледот на 10-ката и ќе ја направи многу помодерна. Fluent Design System ќе можат да го следат сите апликации, на многу различни уреди, со цел унифицирано искуство.
Покрај можностите на самиот оперативен систем, “Fall Creators Update” ќе донесе и нова апликација за креаторите, наречена Windows Story Remix. Се работи за софтвер со кој може да се прават 3D мултимедијални видео креации или пак „слајдшоу“ од фотографии, односно 3D објекти.
Ова се само поважните новитети кои треба да пристигна во есенскиот “Fall Creators Update”, кои Microsoft ги претстави на Build конференцијата. Во меѓувреме сигурен сум дека ќе бидат претставени многу нови подобрувања, кои прво ќе можат да ги искусат Insider корисниците.
Извор: Venture Beat, Windows Central, The Verge
