Една од главните предности на Mac OS во однос на Windows отсекогаш биле вградените апликации за креаторите, односно оние кои работат со музика, фотографија и видео. Сепак, со Creators Update и идниот Fall Creators Update, Microsoft сака да го направи Windows 10 изборот број 1 кога се во прашање ваквите програми и апликации.
Сето ова почна со Paint 3D, која е уникатна апликација која овозможува лесно креирање на 3D цртежи, но вистинскиот исчекор напред Windows 10 ќе го направи со Story Remix.
Се работи за универзална Windows 10 апликација (подоцна, Story Remix ќе биде достпана и за iOS и за Android корисниците), која овозможува креирање на 3D објекти и нивно ставање во видеа. Поточно, со оваа апликација буквално ќе имате можност да правите видеа како холивудските компании за компјутерска преработка, но многу полесно и поедноставно.
Како би изгледало тоа? Замислете да работите на видео од фудбалски натпревар и да можете да напишете текст со вашето Surface Pen пенкалце и да го ставите на некој играч. Потоа, може да изберете текстот да го следи тој играч и тој секогаш ќе остане со него, независно каде се наоѓа тој во видео рамката. Исто така, може да ставите посебен филтер на топката, на пример да изгледа како огнена топка и софтверот сам ќе ја следи каде и да оди.
Story Remix ќе функционира одлично со Paint 3D, бидејќи елементите кои ќе ги направите во тој софтвер, потоа ќе може да ги префрлите во самите видеа. На пример, може да ставите дополнителен фудбалер на теренот или пак змеј.
Шала на страна, можностите се неограничени и останува на самите креатори што можат да направат. Секако, апликацијата се уште не е финална и очекувајте промени.
Сите овие работи можат да ги направат многу други софтвери, но моќта на Story Remix е во тоа што е полесен за користење, бидејќи користи машинско учење во облакот (Cloud) и вештачка интелигенција.
Исто така, тој е целосно бесплатен и ќе доаѓа вграден во Windows 10 Fall Creators Update, што значи дека ќе го добијат сите корисници кои во моментов имаат Windows 10.
Извор: Engadget, TechCrunch, The Verge
Фото: Tech Crunch
