Иднината на компјутерските уреди е дефинитивно еден уред, кој ќе може да направи многу повеќе работи. На пример, телефон или таблет кој со поврзување на маус, тастатура и надворешен дисплеј, ќе можат да се претворат во целосен компјутер. Continuum во Windows 10 Mobile беше првата реализација на ваквата идеја, но сега зад опашката ќе го има Convergence на Ubuntu кои ваквата можност ја најавуваат поодамна.
Convergence прво требаше да работи со Ubuntu смартфон и беше идеја која беше спомената уште пред Microsoft да го прикаже Continuum, но не успеа бидејќи Canonical компанијата која стои зад софтверот, не успеа да собере 32 милиони долари, колку што беше потребно за почеток на производството. Сега, тие имаат 10 – инчен таблет, кој лесно и елегантно може да се претвори во целосен Ubuntu десктоп компјутер.
Перформансите не очекувајте да се високи – во BQ Aquaris M10 таблетот (шпански производител – Canonical нема сопствено хардвер производство) има MediaTek процесор со четири јадра на 1,5 GHz и само 2 GB рам меморија. Ова е веројатно доволно добро додека го работите како таблет, со основните апликации, но никако за сериозна работа со маус и тастатура на десктоп околина.
На позитивна нота – батеријата трае одлични 11 часа, дисплејот има одлична резолуција од 1920х1200 пиксели, а таблетот има и задна камера со 8 и предна со 5 мегапиксели.
Сепак, тука главната приказна лежи во софтверот – односно Convergence за Ubuntu. За оние кои не виделе, Ubuntu за таблет е прилично иновативен кориснички интерфејс – има еден дисплеј на кој прикажува разни информации и нотификации, како од вестите и пораките, потоа со лизгање лево се прикажуваат апликациите, додека со лизгање десно неодамна користените апликации.
Со поврзувањето на поголем дисплеј, сепак, Ubuntu се претвора во познатиот десктоп оперативен систем, кој е одличен за управување со маус и тастатура и кој има многу фанови низ светот. За него има и доволно софтвер, ако сакате да научите да работите на малку различни програми – многу корисници го користат како секојдневно решение.
Сепак, многу од тие програми не се развиени за дисплеј на допир и во таблет модот, бројот на апликациите е многу, многу мал. Ова нормално може многу брзо да се смени – дивелоперите треба само да ги редизајнираат апликациите за да може да се користат на дисплеј на допир.
Најдоброто од се кај Convergence е што реално може да се користи со секој таблет на кој ќе биде инсталиран, а бидејќи е Linux оперативен систем, Ubuntu може да се инсталира на скоро сите можни чипови – и ARM и x86. Во превод, ова наскоро ќе можете да го пробате и на вашиот застарен Android таблет и да го искористите како вистинско десктоп решение.
