Новата верзија на Windows донесе нови функции, но исто така одредени функции што беа достапни во верзијата 8, се тргнати во верзијата 8.1. Кои функции Microsoft реши да ги тргне во Windows 8.1?
1. Messaging апликацијата
Оваа апликација беше наменета за разговор со вашите Windows Live Messenger пријатели, чет сервис кој што е веќе затворен и сите контакти префрлени на Skype. Исто така преку Messaging можевте да се поврзете и разговарате со вашите Facebook пријатели, нешто што сеуште не е можно со „модерната“ верзија на Skype. Сепак со пуштањето на Windows 8.1 и исклучувањето на Messaging достапна стана официјалната Facebook апликација, преку која што може да разговарате со пријателите.
2. Windows Experience Index
Ова е алатка која правеше скенирање на хардверот на вашиот компјутер и доделуваше оценка која треба да претставува одреден показател за јачината на хардверските компоненти и со тоа искуството што може да го очекувате при користење на компјутерот.
3. Сликите од Facebook и Flickr во Photos апликацијата
Photos апликацијата нудеше можност за најавување на Facebook и Flick и со тоа сите слики од овие сервиси можеше да ги гледате директно преку оваа апликација. Истата можност е сега укината, па преку апликацијата може да ги гледате сликите од вашиот компјутер и од Skydrive.
4. Libraries
Ова беше функција на Windows File Explorer со која вашите Documents, Music, Pictures и Videos папки беа прикажани на почетокот на десната лента за побрзо пристапување до истите. Сега истите се достапни доколку ја проширите This PC локацијата, а исто така може да ги вратите со притискање на View лентата, па на Navigation Panel менито.
5. Windows 7 File Recovery
Функција за правење на Backup на Windows сега заменета со File History.
6. Нови апликации закачени на Start екранот
Во Windows 8 сите нови апликации инсталирани во Start или Desktop околината беа стандардно додавани како плочки закачени на Start екранот. Сега што и да инсталирате се додава во All Apps, па треба да ја најдете апликацијата и ако сакате да ја закачите на Start екранот.
7. My Computer
Познатата My Computer локација на која што беа прикажани сите ваши дискови, сега има ново име, This PC.
8. SkyDrive десктоп програмата
SkyDrive е интегриран во Windows 8.1, па поради тоа веќе ја нема програмата преку која што ги правевте сите прилагодувања околу синхронизацијата со облакот. Сега прилагодувањата се дел од главните PC Settings.
