Едно од најимпресивните парчиња технологија претставено последниве неколку години е секако HoloLens на Microsoft – уредот преку кој може да гледате холограми во просторот околу Вас. Досега HoloLens беше достапен само за дивелоперите, но отсега (скоро секој) што има 3.000 долари плус, може да го има овој уред за себе.
Уште веднаш, едно мало разочарување – засега HoloLens ќе се продава само во САД и Канада. Сепак, ова реално и не е некое ограничување за македонскиот купувач – сите имаме по некој роднина или пријател во таа земја кој ќе може да ни го донесе ова футуристичко парче технологија. Всушност, веројатно поголем проблем ќе бидат самите пари…
HoloLens инаку има толку висока цена бидејќи во него е вграден цел Windows 10 компјутер, поточно не мора да го поврзувате со надворешен компјутер, како што треба да се направи со многу уреди за виртуелна реалност. Секако, во иднина цената на HoloLens секако би се симнала на пониско ниво – ова е прв модел на технологија која сѐ уште е во почетна фаза. Моделот наменет за пошироката публика инаку има неколку подобрувања, пред сѐ во делот на безбедноста.
HoloLens инаку има многу можности, но во почеток го гледам пред се за уред кој може драматично да ја подобри работата на дизајнерите и сите оние кои работат со 3D моделирање, бидејќи со него ќе можат да ги видат своите модели во опкружувањето, во реална големина. Секако, пукањето вонземјани во вашата дневна соба е исто така забавно, па и гејмингот може да биде многу силна страна.
Извор: Ubergizmo, PC Magazine, The Verge
