Една од поинтересните новости изминатиот период беше секако најавата дека Microsoft го купува GitHub за 7,5 милијарди долари. Веднаш по објавата голем број од програмерите кои се дел од оваа заедница ги истакнаа своите „грижи“ околу оваа зделка, а голем дел од нив и веднаш најавија дека го напуштаат GitHub.
GitHub инаку е еден вид на таканаречено „складиште“, односно место каде програмерите го објавуваат кодот од своите програми и проекти, а токму GitHub е можеби и најпознатото и најпопуларно место за оваа намена. На оваа страна своите проекти ги објавуваат и компании како Google, Facebook, Apple и слични, покрај огромниот број на помали и независни програмери.
Според изјавата на Дајен Грин, главната во Google за сервиси во облакот, изгледа и оваа компанија била заинтересирана за купување на GitHub. Таа за време на настан од Fortune Magazine во текот на вчерашниот ден изјави – „Јас на би имала против да ги купевме, но во ред е“.
Од оваа изјава се разбира не може дефинитивно да се заклучи дека Google учествувале во посебни преговори за купување на GitHub, меѓутоа се смета како еден вид на потврда на неофицијалните информации за ова.
Инаку, повеќето компании кои работат на оваа платформа се надеваат дека Microsoft ќе успее да ја задржи работата на GitHub како што беше до сега, без да направи промени кои би ги избркало програмерите.
